Psa 2 | NdeIBE | STEP | Kungani izizwe zixokozela na, labantu besakha amasu ayize?

Psalms 2

1 Kungani izizwe zixokozela na, labantu besakha amasu ayize?

2 Amakhosi omhlaba azimisele lababusi bahlangana ndawonye ukumelana loJehova njalo bamelane lalowo Ogcotshiweyo Wakhe.

3 Bathi, “Kasiwaqamuleni amaketane abo, silahle izibopho zabo.”

4 Yena osesihlalweni ezulwini uyahleka; uJehova ubahleka ulunya.

5 Abesebakhalimela ngolaka, abathuthumelise ngentukuthelo yakhe, esithi,

6 “Sengiyibekile eyami inkosi phezu kweZiyoni, intaba yami engcwele.”

7 Ngizasimemezela isimiso sikaJehova: Wathi kimi, “UyiNdodana yami; lamuhla senginguyihlo.

8 Cela kimi, ngizakwenza izizwe zibe yilifa lakho, imikhawulo yomhlaba kube yinotho yakho.

9 Uzazibusa ngentonga yobukhosi eyensimbi; uzazibhidliza zicubuzeke njengebumba.”

10 Ngakho-ke lina makhosi, limukani; liyaxwayiswa lina babusi bomhlaba.

11 Mkhonzeni uJehova ngokumesaba, lithokoze lithuthumele.

12 Ikhothameleni iNdodana, funa ithukuthele beselibhujiswa endleleni yenu, ngoba intukuthelo yakhe ingavutha ngesikhatshana. Babusisiwe bonke abaphephela kuye.